XotirAI logotipiXotirAI
⚖️ Jinoyat kodeksi · 27–31-m.

Jinoyatda ishtirokchilik

Ikkinchi Bo‘Lim

🧠 Bu mavzuni yodlash📝 Test yechish

27-modda. Jinoyatda ishtirokchilik tushunchasi

Ikki yoki undan ortiq shaxsning qasddan jinoyat sodir etishda birgalashib qatnashishi ishtirokchilik deb topiladi.

28-modda. Jinoyat ishtirokchilarining turlari

Jinoyatni bajaruvchi bilan bir qatorda tashkilotchi, dalolatchi va yordamchilar ham jinoyat ishtirokchilari deb topiladi.

Jinoyatni bevosita to‘la yoki qisman sodir etgan yoxud ushbu Kodeksga muvofiq javobgarlikka tortilishi mumkin bo‘lmagan shaxslardan yoki boshqa vositalardan foydalanib, jinoyat sodir etgan shaxs bajaruvchi deb topiladi.

Jinoyatga tayyorgarlik ko‘rilishiga yoki jinoyat sodir etilishiga rahbarlik qilgan shaxs tashkilotchi deb topiladi.

Jinoyat sodir etilishiga qiziqtiruvchi shaxs dalolatchi deb topiladi.

Jinoyat sodir etilishiga o‘z maslahatlari, ko‘rsatmalari bilan, vositalar berish yoki to‘siqlarni yo‘qotish bilan ko‘maklashgan, shuningdek jinoyatchini, jinoyat sodir etish quroli, izlari va vositalarini yoxud jinoiy yo‘l bilan qo‘lga kiritilgan narsalarni yashirishga, shuningdek bunday narsalarni olish va o‘tkazish to‘g‘risida oldindan va’da bergan shaxs yordamchi deb topiladi.

29-modda. Ishtirokchilikning shakllari

Jinoyatda ishtirokchilik: oddiy ishtirokchilik, murakkab ishtirokchilik, uyushgan guruh, jinoiy uyushma shaklida bo‘ladi.

Ikki yoki undan ortiq shaxsning oldindan til biriktirmay jinoyat sodir etishda qatnashishi oddiy ishtirokchilik deb topiladi.

Ikki yoki undan ortiq shaxsning oldindan til biriktirib jinoyat sodir etilishida ishtirok qilishi murakkab ishtirokchilik deb topiladi.

Ikki yoki undan ortiq shaxsning birgalikda jinoiy faoliyat olib borish uchun oldindan bir guruhga birlashishi uyushgan guruh deb topiladi.

Ikki yoki undan ortiq uyushgan guruhning jinoiy faoliyat bilan shug‘ullanish uchun oldindan birlashishi jinoiy uyushma deb topiladi.

30-modda. Jinoyatda ishtirok etganlik uchun javobgarlik doirasi

Tashkilotchi, dalolatchi va yordamchilar ham ushbu Kodeks Maxsus qismining bajaruvchini javobgarlikka tortish belgilangan moddasi bo‘yicha javobgarlikka tortiladilar.

Oldindan til biriktirgan guruh, jinoiy guruh va jinoiy uyushmaning tashkilotchilari hamda a’zolari tayyorgarlik ko‘rilishi yoki sodir etilishida o‘zlari qatnashgan barcha jinoyatlar uchun javobgarlikka tortiladilar.

Uyushgan guruh yoki jinoiy uyushma tashkil etgan yoki ularga rahbarlik qilgan shaxslar shu guruh yoki uyushma sodir etgan barcha jinoyatlar uchun, basharti, bu jinoyatlar ularning jinoiy niyati bilan qamrab olingan bo‘lsa, javobgarlikka tortiladilar.

Boshqa ishtirokchilarning jinoiy niyati bilan qamrab olinmagan qilmish uchun uni sodir etgan shaxs javobgar bo‘ladi.

Tashkilotchi, dalolatchi yoki yordamchi jinoyatdan ixtiyoriy ravishda qaytib, jinoyatning oldini olish uchun o‘ziga bog‘liq bo‘lgan barcha choralarni o‘z vaqtida ko‘rganligi, jinoyatda ishtirokchilik uchun javobgarlikni istisno qiladi.

31-modda. Jinoyatga daxldorlik

Jinoyatga tayyorgarlik ko‘rilayotganligi, jinoyat sodir etilayotganligi yoki jinoyat sodir etilganligi haqida aniq bila turib, oldindan va’da bermagan holda, hokimiyat organlariga xabar qilmaslik, ushbu Kodeksning 155¹va 241-moddalarida nazarda tutilgan hollardagina javobgarlikka sabab bo‘ladi.

Jinoyatchini, jinoyat sodir etish quroli va vositalarini, jinoyat izlarini yoki jinoiy yo‘l bilan qo‘lga kiritilgan narsalarni oldindan va’da bermagan holda yashirganlik ushbu Kodeksning 241-moddasida nazarda tutilgan hollardagina javobgarlikka sabab bo‘ladi.

Oldindan va’da bermagan holda jinoyat haqida xabar bermaganlik yoki jinoyatni yashirganlik uchun gumon qilinuvchi, ayblanuvchi yoki sudlanuvchining yaqin qarindoshlari javobgarlikka tortilmaydi.

Bilimingizni sinang

Jinoyat kodeksi — 27-modda qaysi masalani tartibga soladi?
  1. Ishtirokchilikning shakllari
  2. Jinoyatga tayyorgarlik ko‘rish va jinoyat sodir etishga suiqasd qilish
  3. Jinoyatda ishtirokchilik tushunchasi
  4. Retsidiv jinoyat

To‘g‘ri javob: Jinoyatda ishtirokchilik tushunchasi. 27-modda: Jinoyatda ishtirokchilik tushunchasi.

Jinoyat kodeksi: «Jinoyatda ishtirokchilik tushunchasi» qaysi moddada belgilangan?
  1. 29-modda
  2. 27-modda
  3. 25-modda
  4. 34-modda

To‘g‘ri javob: 27-modda. 27-modda: Jinoyatda ishtirokchilik tushunchasi.

Jinoyat kodeksiga ko‘ra jinoyatda ishtirokchilik deb nima topiladi?
  1. Ikki yoki undan ortiq shaxsning qasddan jinoyat sodir etishda birgalashib qatnashishi
  2. Ikki yoki undan ortiq shaxsning ehtiyotsizlik orqasida jinoyat sodir etishda qatnashishi
  3. Bir shaxsning bir necha jinoyatni ketma-ket sodir etishi
  4. Uch yoki undan ortiq shaxsning faqat oldindan til biriktirib jinoyat sodir etishi

To‘g‘ri javob: Ikki yoki undan ortiq shaxsning qasddan jinoyat sodir etishda birgalashib qatnashishi. 27-moddaga ko‘ra ikki yoki undan ortiq shaxsning qasddan birgalashib jinoyat sodir etishi ishtirokchilik hisoblanadi.

Jinoyat kodeksi — 28-modda qaysi masalani tartibga soladi?
  1. Jinoyatlar majmui
  2. Qilmishning jinoiyligini istisno qiladigan holatlar tushunchasi
  3. Takroran jinoyat sodir etish
  4. Jinoyat ishtirokchilarining turlari

To‘g‘ri javob: Jinoyat ishtirokchilarining turlari. 28-modda: Jinoyat ishtirokchilarining turlari.

Jinoyat kodeksi: «Jinoyat ishtirokchilarining turlari» qaysi moddada belgilangan?
  1. 33-modda
  2. 28-modda
  3. 35-modda
  4. 32-modda

To‘g‘ri javob: 28-modda. 28-modda: Jinoyat ishtirokchilarining turlari.

Jinoyatga tayyorgarlik ko‘rilishiga yoki jinoyat sodir etilishiga rahbarlik qilgan shaxs jinoyatda kim hisoblanadi?
  1. Dalolatchisi
  2. Tashkilotchi
  3. Bajaruvchisi
  4. Yordamchisi

To‘g‘ri javob: Tashkilotchi. 28-moddaga ko‘ra jinoyat tayyorlanishi yoki sodir etilishiga rahbarlik qilgan shaxs tashkilotchi deb topiladi.

Akmal Jamshidni qo‘shnining do‘konidan pul o‘g‘irlashga ko‘ndirib, buning uchun mukofot va’da qildi. Jamshid o‘g‘irlikni sodir etdi. Akmal jinoyatda qanday ishtirokchi hisoblanadi?
  1. Tashkilotchi
  2. Yordamchi
  3. Dalolatchi
  4. Bajaruvchi

To‘g‘ri javob: Dalolatchi. 28-moddaga ko‘ra jinoyat sodir etilishiga qiziqtiruvchi shaxs dalolatchi deb topiladi.

Quyidagi harakatlardan qaysi biri jinoyatda yordamchining harakati hisoblanadi?
  1. Jinoyatga tayyorgarlik ko‘rilishiga yoki sodir etilishiga rahbarlik qilish
  2. Boshqa shaxsni ko‘ndirish yoki rag‘batlantirish orqali jinoyatga undash
  3. Jinoyatni bevosita o‘zi to‘la sodir etish yoki boshqalar bilan birga bajarish
  4. Jinoyat sodir etish uchun vositalar berish yoki to‘siqlarni yo‘qotish

To‘g‘ri javob: Jinoyat sodir etish uchun vositalar berish yoki to‘siqlarni yo‘qotish. 28-moddaga ko‘ra vositalar berish yoki to‘siqlarni yo‘qotish bilan ko‘maklashgan shaxs yordamchi deb topiladi.

Faqat o‘qish yetarli emas

XotirAI mavzuni savollar bilan so‘raydi va keyingi takrorlash vaqtini o‘zi belgilaydi.

🚀 Yodlashni boshlash
← OldingiAyb · Tamom bo‘lmagan jinoyatKeyingi →Bir qancha jinoyat sodir etish