Bolalarni tutingan (foster) oilaga olish

Vi Bo‘Lim. Yetim Bolalarni Va Ota-Ona Qaramog‘Idan Mahrum Bo‘Lgan Bolalarni Muqobil Joylashtirish Shakllari

194-modda. Tutingan (foster) oilaga beriladigan bolalar

Yetim bolalar va ota-ona qaramog‘idan mahrum bo‘lgan voyaga yetmagan bolalar, shu jumladan tarbiya, davolash va sog‘lomlashtirish muassasalaridagi, shuningdek aholini ijtimoiy himoyalash muassasalaridagi hamda shunga o‘xshash boshqa muassasalardagi bolalar tutingan (foster) oilaga beriladi.

Tutingan (foster) oila oilaga tarbiyaga berish (patronat) shaklida hamda bolalarga oilaga yaqin muhitda g‘amxo‘rlik ko‘rsatishning qonunchilikda belgilangan boshqa shakllarida tashkil etiladi.

Yetim bolalar va ota-ona qaramog‘idan mahrum bo‘lgan bolalar oilaga tarbiyaga (patronat) faqat ularning qarindoshlariga beriladi.

Bolalarni tutingan (foster) oilaga olishni istagan shaxs vasiylik va homiylik organlari bilan kelishilgan holda bolalarni oldindan tanlab oladi, bundan qonunchilikda nazarda tutilgan hollar mustasno.

Bolalarni tutingan (foster) oilaga berish ularning xohishini hisobga olgan holda amalga oshiriladi. O‘n yoshga to‘lgan bolalarni ularning roziligi bilan tutingan (foster) oilaga berish mumkin.

Bolalarni tutingan (foster) oilaga berish tartibi va shartlari qonunchilik bilan belgilanadi.

195-modda. Bolalarni tutingan (foster) oilaga olish to‘g‘risidagi shartnoma

Bolalarni tutingan (foster) oilaga olish to‘g‘risidagi shartnoma vasiylik va homiylik organlari bilan tutingan ota-ona o‘rtasida tuziladi.

Bolalarni tutingan (foster) oilaga olish to‘g‘risidagi shartnomada bolalarni ta’minlash, tarbiyalash va ularga ta’lim berish, tarbiyaga olgan tutingan ota-onaning huquq va majburiyatlari, vasiylik va homiylik organlarining bolalarni tarbiyaga olgan oilaga nisbatan majburiyatlari, shuningdek bunday shartnomani bekor qilish asoslari va oqibatlari ko‘rsatilishi kerak.

Shartnoma tuzilishidan oldin bolani tarbiyaga olayotgan shaxsning turmush shart-sharoitlari va oila a’zolarining sog‘lig‘i tekshiriladi.

Bolalarni oilaga tarbiyaga (patronat) olgan shaxslarga oilaga tarbiyaga olingan bolaning ta’minoti uchun har oyda nafaqa, shuningdek kiyim-bosh va poyabzal olish uchun har yili bir martalik to‘lov qonunchilikda belgilangan miqdorda to‘lab boriladi.

Bolalarga oilaga yaqin muhitda g‘amxo‘rlik ko‘rsatishning boshqa shaklida har bir tarbiyalanuvchining yashash xarajatlari hamda parvarish qilinishi uchun tutingan ota-onaga to‘lanadigan mablag‘lar qonunchilik hujjatlariga muvofiq to‘lanadi.

196-modda. Bolalarni tutingan (foster) oilaga olish to‘g‘risidagi shartnomani bekor qilish

Bolalarni tutingan (foster) oilaga olish to‘g‘risidagi shartnoma uzrli sabablar (kasalligi, oilaviy yoki mulkiy mavqeyining o‘zgarishi, tarbiyasidagi bolalar bilan o‘zaro bir-birini tushunmaslik va boshqa sabablar) mavjud bo‘lsa, bolalarning tutingan ota-onasi tashabbusi bilan, shuningdek vasiylik va homiylik organlarining tashabbusi bilan yoki bola ota-onasiga qaytarilgan yoxud bola farzandlikka olingan taqdirda muddatidan ilgari bekor qilinishi mumkin.

Bolalarni tutingan (foster) oilaga olish to‘g‘risidagi shartnomani bekor qilishga oid nizolar sud tartibida hal qilinadi.

197-modda. Tutingan (foster) oilaga olingan bolalarning huquqlari

Tutingan (foster) oilaga berilgan bolalar:

o‘zlariga tegishli bo‘lgan aliment, shuningdek pensiya, nafaqa va boshqa ijtimoiy to‘lovlarni olish;

uy-joyga bo‘lgan mulk huquqi yoki uy-joylardan foydalanish;

qonunchilikka muvofiq uy-joy olish huquqlarini saqlab qoladilar.

Tutingan (foster) oilaga berilgan bolalar o‘z huquq va manfaatlarini himoya qilish, ota-onasi va qarindoshlari bilan ko‘rishish huquqiga ham egadirlar.

Bolaning manfaatlariga taalluqli har qanday masala hal qilinayotganda bola o‘z fikrini erkin ifoda etishga haqli.

198-modda. Tutingan ota-ona

Voyaga yetgan har ikki jinsdagi shaxslar tutingan ota-ona bo‘lishi mumkin, bundan ushbu Kodeks 152-moddasi birinchi qismining ikkinchi — o‘ninchi xatboshilarida nazarda tutilgan shaxslar mustasno.

Yetim bolalarga va ota-ona qaramog‘idan mahrum bo‘lgan bolalarga tutingan ota-ona bo‘lish istagini bildirgan shaxslar qonunchilikda belgilangan tartibda maxsus o‘quv kursini tamomlaganlik to‘g‘risidagi sertifikatga ega bo‘lishi kerak.

Tutingan ota-onalarni tanlash vasiylik va homiylik organlari tomonidan amalga oshiriladi.

Tutingan ota-ona tarbiyaga olingan bolaga nisbatan qonunchilik hujjatlariga muvofiq huquq va majburiyatlarga ega bo‘ladi.

199-modda. Bolalarni tutingan (foster) oilaga olgan shaxslarning javobgarligi

Bolalarni tutingan (foster) oilaga olgan shaxslar o‘z huquqlaridan g‘arazgo‘ylik yoki boshqa past niyatlarda, tarbiyasidagi bolalarga zarar keltirgan holda foydalansalar, shuningdek ularni nazoratsiz hamda zarur moddiy yordamsiz qoldirsalar, vasiylik va homiylik organi bolalarni tutingan (foster) oilaga olgan shaxslarni qonunda belgilangan tartibda javobgarlikka tortish masalasini qo‘zg‘atishga haqli.

200-modda. Tutingan (foster) oilaga berilgan bolalarning turmush sharoitlarini va ularning tarbiyalanishini kuzatib borish hamda monitoring qilish

Vasiylik va homiylik organlari tutingan (foster) oilaga berilgan bolalarning turmush sharoitlarini va ularning tarbiyalanishini kuzatib boradi hamda monitoring qiladi.

Bilimingizni sinang