Shaxsni jinoiy javobgarlikka tortish yoki hukmni ijro etish uchun ushlab berish (3/3)

To‘Qqizinchi Bo‘Lim

617-modda. Xorijiy davlat sudining qarorini o‘zgartirish yoki bekor qilish

Xorijiy davlat sudining qarorini qayta ko‘rib chiqish bilan bog‘liq har qanday masalalar mazkur davlatning sudi tomonidan hal qilinadi.

O‘zbekiston Respublikasida jazo o‘tayotgan yoki majburiy davolanayotgan shaxsga nisbatan chiqarilgan xorijiy davlat sudining qarori bekor qilingan yoki o‘zgartirilgan yoxud xorijiy davlat yoki O‘zbekiston Respublikasi tomonidan amnistiya yoki afv etish akti qo‘llanilgan taqdirda, xorijiy davlat sudining qayta ko‘rib chiqilgan qarorini ijro etish, shuningdek amnistiya yoxud afv etish aktini qo‘llash masalalari O‘zbekiston Respublikasining qonunchiligiga muvofiq hal qilinadi.

Agar xorijiy davlat sudining qarori bekor qilingan va ish sud muhokamasida yangitdan ko‘rish uchun tayinlangan bo‘lsa, kelgusida jazoni o‘tash to‘g‘risidagi masala O‘zbekiston Respublikasi Bosh prokuraturasi tomonidan ushbu Kodeksga muvofiq hal qilinadi.

618-modda. Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun berish shartlari

Ushbu Kodeksning 611-moddasida ko‘rsatilgan shaxslarni O‘zbekiston Respublikasi tomonidan berish ozodlikdan mahrum qilish tarzidagi jazoni o‘tayotgan yoki majburiy davolanishda bo‘lgan shaxsning yoxud uning qonuniy vakilining yoki yaqin qarindoshining arizasiga ko‘ra, shuningdek berilayotgan shaxsning yoki uning qonuniy vakilining roziligi bilan O‘zbekiston Respublikasi Bosh prokuraturasining yoki xorijiy davlat vakolatli organining so‘roviga ko‘ra yo‘l qo‘yiladi.

Ushbu Kodeksning 611-moddasida ko‘rsatilgan shaxslarni O‘zbekiston Respublikasi tomonidan berish O‘zbekiston Respublikasi Bosh prokurorining yoki uning o‘rinbosarining qaroriga ko‘ra amalga oshiriladi.

619-modda. Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun berish to‘g‘risidagi masalani hal qilish tartibi

O‘zbekiston Respublikasi Bosh prokurori yoki uning o‘rinbosari ushbu Kodeksning 611-moddasida ko‘rsatilgan shaxslarni berish to‘g‘risidagi materiallarni o‘rganib va tekshirib chiqqanidan keyin, agar ular tegishli tarzda rasmiylashtirilgan bo‘lsa hamda ushbu Kodeksda va O‘zbekiston Respublikasining xalqaro shartnomasida nazarda tutilgan asoslar mavjud bo‘lganda mazkur shaxslarni berish to‘g‘risida qaror qabul qiladi, bu haqda xorijiy davlatning vakolatli organiga va berish masalasini ko‘rib chiqish to‘g‘risida murojaat qilgan shaxsga xabar qiladi.

Ushbu Kodeksning 611-moddasida ko‘rsatilgan shaxslarning berilishi ularni muddatidan ilgari shartli ravishda ozod qilish, jazoning o‘talmay qolgan qismini yengilroq jazo bilan almashtirish, afv etish, amnistiya aktini qo‘llash, shuningdek tibbiy yo‘sindagi majburlov chorasini qo‘llashni tugatish yoki o‘zgartirish to‘g‘risida O‘zbekiston Respublikasining qonunchiligida nazarda tutilgan tartibda iltimos qilish huquqidan mahrum etmaydi.

O‘zbekiston Respublikasi Bosh prokuraturasi ushbu Kodeksning 611-moddasida ko‘rsatilgan shaxsni berish to‘g‘risida qabul qilingan qaror haqida, shuningdek xorijiy davlat sudining O‘zbekiston Respublikasi sudining qarorini tan olish va ijroga qaratish to‘g‘risidagi qarori haqida hukmni yoki ajrimni chiqargan sudni xabardor qiladi.

O‘zbekiston Respublikasida amnistiya akti e’lon qilingan taqdirda, prokurorning iltimosnomasiga binoan sud berilgan shaxsga nisbatan amnistiya aktini qo‘llash to‘g‘risidagi masalani ko‘rib chiqadi.

620-modda. Berilgan shaxsga nisbatan sud hukmini bekor qilish yoki o‘zgartirish, shuningdek tibbiy yo‘sindagi majburlov chorasini qo‘llashni tugatish yoki o‘zgartirish to‘g‘risidagi xabarnoma

Xorijiy davlatga jazoni o‘tashni davom ettirish uchun berilgan shaxsga nisbatan O‘zbekiston Respublikasi sudining hukmini yoki majburiy davolashni davom ettirish uchun berilgan shaxsga nisbatan tibbiy yo‘sindagi majburlov chorasini qo‘llash to‘g‘risidagi sud ajrimi bekor qilingan yoki o‘zgartirilgan taqdirda, shuningdek ularga nisbatan O‘zbekiston Respublikasida amnistiya akti yoxud afv etish qo‘llanilgan taqdirda, O‘zbekiston Respublikasi Bosh prokuraturasi xorijiy davlatning vakolatli organiga tegishli qarorning ko‘chirma nusxasini yuboradi.

621-modda. Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun xorijiy davlatga berishni rad etish

Ushbu Kodeksning 611-moddasida ko‘rsatilgan shaxslarni berish quyidagi hollarda rad etilishi mumkin, agar:

• 1) shaxsning ozodlikdan mahrum qilish jazosiga hukm qilinishiga yoki unga nisbatan tibbiy yo‘sindagi majburlov chorasi qo‘llanilishiga sabab bo‘lgan qilmishlarning hech biri u fuqarosi bo‘lgan davlatning yoki doimiy yashash joyidagi davlatning qonunchiligiga ko‘ra jinoyat deb e’tirof etilmasa;
• 2) ozodlikdan mahrum etilgan shaxsni yoki o‘ziga nisbatan tibbiy yo‘sindagi majburlov chorasi qo‘llanilgan shaxsni berish to‘g‘risida mazkur davlat bilan kelishuvga erishilmagan bo‘lsa;
• 3) ozodlikdan mahrum etilgan shaxsni yoki o‘ziga nisbatan tibbiy yo‘sindagi majburlov chorasi qo‘llanilgan shaxsni berish O‘zbekiston Respublikasining manfaatlariga zarar yetkazishi mumkin bo‘lsa;
• 4) ozodlikdan mahrum etilgan shaxs yoki o‘ziga nisbatan tibbiy yo‘sindagi majburlov chorasi qo‘llanilgan shaxs hukmni ijro etuvchi davlatning fuqarosi bo‘lmasa;
• 5) xorijiy davlatda jinoiy javobgarlikka tortish muddati o‘tib ketganligi oqibatida yoki ushbu davlatning qonunchiligida nazarda tutilgan boshqa asoslarga ko‘ra jazoni ijro etish mumkin bo‘lmasa;
• 6) ozodlikdan mahrum etilgan shaxsni berish to‘g‘risidagi so‘rov olingan paytda ozodlikdan mahrum qilish jazosining o‘talmay qolgan qismi olti oydan kam bo‘lsa;
• 7) xorijiy davlatning qonunchiligida xuddi shunday tibbiy yo‘sindagi majburlov chorasi nazarda tutilmagan bo‘lsa;

621-modda. Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun xorijiy davlatga berishni rad etish (davomi)

• 8) xorijiy davlatda zaruriy davolanishni va tegishli maxsus tibbiy choralarni ta’minlash imkoni mavjud bo‘lmasa;
• 9) O‘zbekiston Respublikasining tegishli xalqaro shartnomalarida nazarda tutilgan boshqa hollarda.

622-modda. Ozodlikdan mahrum etilgan shaxsni jazoni o‘tash uchun berishning huquqiy oqibatlari

Hukmni ijro etuvchi davlatga jazoni o‘tash uchun berilgan ozodlikdan mahrum etilgan shaxsga nisbatan ushbu davlat hududida xuddi shu kabi jinoyat uchun hukm qilingan shaxslarga nisbatan ayni shunday huquqiy oqibatlar kelib chiqadi.

Boshqa davlat sudi tomonidan hukm qilingan va jazoni ijro etish uchun berilgan shaxs hukmni ijro etuvchi davlat hududida aynan shu qilmishi uchun takroran jinoiy javobgarlikka tortilishi mumkin emas.

623-modda. Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun berish va qabul qilib olish bilan bog‘liq xarajatlar

Ozodlikdan mahrum etilgan shaxsni jazoni o‘tashni davom ettirish uchun, shuningdek o‘ziga nisbatan tibbiy yo‘sindagi majburlov chorasi qo‘llanilgan shaxsni majburiy davolashni davom ettirish uchun berish va qabul qilib olish bilan bog‘liq xarajatlar O‘zbekiston Respublikasining xalqaro shartnomalarida belgilangan tartibda amalga oshiriladi.

Bilimingizni sinang