Dastlabki tergovni to‘xtatish va qayta tiklash

To‘Qqizinchi Bo‘Lim

364-modda. Dastlabki tergovni to‘xtatish asoslari va tartibi

Dastlabki tergov:

• 1) ish bo‘yicha ayblanuvchi tariqasida ishtirok etishga jalb qilinishi lozim bo‘lgan shaxs aniqlanmagan;
• 2) ayblanuvchining qayerda ekanligi noma’lum bo‘lgan;
• 3) ayblanuvchi O‘zbekiston Respublikasi hududidan chiqib ketgan, basharti uning tergovga kelishini ta’minlash imkoniyati bo‘lmasa;
• 4) ayblanuvchi ishni yuritishda uning ishtirok etishini istisno etadigan og‘ir va davomli, lekin davolab bo‘ladigan kasallikka chalingan hollarda to‘xtatiladi.

Dastlabki tergov ushbu moddaning birinchi qismida nazarda tutilgan asoslar yuzaga kelgan vaqtdan boshlab to‘xtatiladi. Lekin dastlabki tergov to‘xtatilgunga qadar tergovchi ayblanuvchi yo‘qligida bajarish mumkin bo‘lgan barcha tergov harakatlarini bajarishi shart.

Dastlabki tergovni to‘xtatish to‘g‘risida tergovchi qaror chiqaradi va uning nusxasini prokurorga yuboradi.

365-modda. Qidiruv e’lon qilish

Ayblanuvchining turgan joyi noma’lum bo‘lganda tergovchi uning turgan joyini aniqlash uchun zarur bo‘lgan barcha choralarni ko‘rishi, zarur hollarda esa, unga nisbatan qidiruv e’lon qilishi shart.

Tergovchi faqat ayblanuvchi tariqasida ishda ishtirok etishga jalb qilinishi to‘g‘risida qaror chiqarilgan shaxsga nisbatan qidiruv e’lon qilishga haqli.

Qidiruv dastlabki tergov o‘tkazilayotganida ham, shuningdek dastlabki tergov to‘xtatilganidan keyin ham e’lon qilinishi mumkin.

Ushbu Kodeksning 242 va 243-moddalarida nazarda tutilgan asoslar mavjud bo‘lganda qidirilayotgan ayblanuvchi topilgan taqdirda, sudning ajrimi bilan unga nisbatan qamoqqa olish tarzidagi ehtiyot chorasi qo‘llanilishi mumkin

Qidirilayotgan ayblanuvchi ushlangan taqdirda u ushlangan joydagi prokuror ushlangan shaxsning qidirilayotgan ayblanuvchi ekanligini aniqlashi va qamoqqa olish uchun qonuniy asoslar mavjudligiga ishonch hosil qilishi lozim.

366-modda. Ayblanuvchi kasal bo‘lib qolganida dastlabki tergovni to‘xtatish

Sud-tibbiyot eksperti yoki psixiatr-ekspert ayblanuvchining kasalini jinoyat ishini yuritishda uning ishtirok etishini istisno etadigan og‘ir va davomli, lekin davolab bo‘ladigan kasallik deb topsa, ish bo‘yicha dastlabki tergov ayblanuvchi sog‘aygunga qadar to‘xtatiladi.

Bunday holda ayblanuvchiga nisbatan tanlangan ehtiyot chorasi tergovchi tomonidan ushbu Kodeksning 236 — 254-moddalarida nazarda tutilgan qoidalarga rioya qilingan holda saqlab qolinishi, o‘zgartirilishi yoki bekor qilinishi mumkin.

367-modda. Jinoyat ishida ayblanuvchi tariqasida ishtirok etishga jalb qilinishi lozim bo‘lgan shaxs aniqlanmagan hollarda dastlabki tergovni to‘xtatish

Barcha tergov harakatlari bajarib bo‘linganidan keyin ham jinoyat ishida ayblanuvchi tariqasida ishtirok etishga jalb qilinishi lozim bo‘lgan shaxs aniqlanmasa, ish yuritishni to‘xtatish mumkin.

Bunday hollarda tergovchi tezkor-qidiruv faoliyatini amalga oshiruvchi organ orqali ayblanuvchi tariqasida ishda ishtirok etishga jalb qilinishi lozim bo‘lgan shaxsni aniqlash va uni javobgarlikka tortish choralarini ko‘rishi shart.

Ayblanuvchi tariqasida ishda ishtirok etishga jalb qilinishi lozim bo‘lgan shaxs aniqlanmaganligi sababli to‘xtatilgan ish Jinoyat kodeksining 64-moddasida belgilangan javobgarlikka tortish muddati o‘tib ketgach, tugatilishi lozim.

368-modda. Ayblanuvchi O‘zbekiston Respublikasi hududidan chiqib ketgan taqdirda dastlabki tergovni to‘xtatish

Ayblanuvchining O‘zbekiston Respublikasi hududidan chiqib ketganligi aniqlangan bo‘lsa va bu hol dastlabki tergov harakatlarida uning hozir bo‘lishini ta’minlash imkonini bermasa, barcha tergov harakatlari bajarilganidan keyin ish bo‘yicha dastlabki tergovni o‘tkazish to‘xtatiladi.

369-modda. Dastlabki tergovni to‘xtatish to‘g‘risidagi qaror

Jinoyat ishi bo‘yicha dastlabki tergov tergovchining qarori bilan to‘xtatiladi. Bu qarorda ishning mohiyati hamda tergovni to‘xtatish asoslari, ushbu Kodeks 364-moddasining birinchi qismidagi 2, 3 va 4-bandlarda nazarda tutilgan hollarda esa, ayblanuvchi tariqasida ishda ishtirok etishga jalb qilingan shaxs ham ko‘rsatiladi.

Tergovchi dastlabki tergovni to‘xtatgach, bu haqda jabrlanuvchini, fuqaroviy da’vogarni, fuqaroviy javobgarni va ularning vakillarini xabardor qiladi.

370-modda. Tergovchining dastlabki tergov to‘xtatilgandan keyingi harakatlari

Tergovchi dastlabki tergovni to‘xtatish asoslariga qarab ichki ishlar organlari va boshqa vakolatli organlardan ayblanuvchi tariqasida ishda ishtirok etishga jalb qilinishi lozim bo‘lgan shaxslarni aniqlash, yashirinib yurgan ayblanuvchilarni qidirib topish uchun ko‘rilayotgan choralardan muntazam xabardor bo‘lib turadi va shu maqsadda o‘zi so‘rov xatlari yuboradi, ma’lumotlar va tushuntiruvlar oladi, jamoatchilikning yordamidan foydalanadi yoxud ayblanuvchining dastlabki tergovning to‘xtatilishiga sabab bo‘lgan kasalligidan vaqti-vaqti bilan xabardor bo‘lib turadi. Ayblanuvchi O‘zbekiston Respublikasi hududidan chiqib ketgan hollarda tergovchi jinoyat sodir etishda ayblanayotgan va boshqa davlatlar hududida yashirinib yurgan shaxslarni ushlab berishni tartibga soluvchi qonunchilikka va xalqaro shartnomalarga muvofiq choralar ko‘radi.

Dastlabki tergov to‘xtatilgandan keyin va u qayta tiklangunga qadar tergov harakatlari o‘tkazilishiga yo‘l qo‘yilmaydi.

371-modda. To‘xtatilgan jinoyat ishi bo‘yicha dastlabki tergovni qayta tiklash

To‘xtatilgan jinoyat ishi bo‘yicha dastlabki tergov:

• 1) tergovni to‘xtatish uchun asos tariqasida ushbu Kodeksning 364-moddasida nazarda tutilgan holatlar bartaraf etilganda;
• 2) ish bo‘yicha ayblanuvchining ishtirokisiz bajarilishi mumkin bo‘lgan qo‘shimcha tergov harakatlarini o‘tkazish zarurati tug‘ilganda qayta tiklanadi.

Dastlabki tergovni to‘xtatish to‘g‘risidagi qaror qonunga nomuvofiq bo‘lsa, prokuror uni bekor qilishi va dastlabki tergovni qayta tiklash to‘g‘risida qaror chiqarishi mumkin.

Tergovchi dastlabki tergovning qayta tiklanganligi haqida prokurorga darhol xabar qiladi.

Ish yuzasidan dastlabki tergov qayta tiklanishi bilan bir paytda dastlabki tergovning o‘tish muddati ham tiklanadi. Tergov muddatining keyinchalik uzaytirilishi dastlabki tergovni to‘xtatishdan oldin o‘tgan tergov muddatini e’tiborga olgan holda ushbu Kodeksning 351-moddasiga binoan amalga oshiriladi.

Bilimingizni sinang