Mahalliy davlat hokimiyati vakillik organlari (2/2)

Moddalar

18-modda. Xalq deputatlari Kengashining Ish tartibi

Xalq deputatlari Kengashi sessiyalarini chaqirish va o‘tkazish, sessiya muhokamasiga masalalar kiritish va ularni ko‘rib chiqish, xalq deputatlari Kengashi organlarini tashkil etish va saylash, ularning faoliyati to‘g‘risidagi hisobotlarni eshitish, Kengash so‘rovini yuborish to‘g‘risidagi taklifni ko‘rib chiqish, Kengash tekshiruvini o‘tkazish, deputatlar so‘rovlarini yuborish, qarorlar loyihalarini ko‘rib chiqish, ovoz berish, qarorlarni o‘qib eshittirish, sessiyaga taklif etilgan shaxslar sonini aniqlash tartibi, shuningdek deputatlarning mas’uliyati va sessiya ishini tashkil etishga doir boshqa masalalar xalq deputatlari Kengashining reglamentiga muvofiq belgilanadi.

19-modda. Xalq deputatlari Kengashining doimiy va muvaqqat komissiyalari

Sessiya muhokamasiga kiritiladigan masalalarni dastlabki tarzda ko‘rib chiqish va tayyorlash, xalq deputatlari Kengashi qarorlarini va O‘zbekiston Respublikasining qonun hujjatlarini ro‘yobga chiqarish uchun ko‘maklashish, shuningdek o‘z vakolatlari doirasida nazoratni amalga oshirish uchun xalq deputatlari Kengashi o‘z vakolatlari muddatiga doimiy va muvaqqat komissiyalar tuzadi.

Xalq deputatlari Kengashlarida, qoida tariqasida, quyidagi doimiy komissiyalar tuziladi:

mahalliy budjet, tadbirkorlikni rivojlantirish va iqtisodiy islohotlar bo‘yicha;

korrupsiyaga qarshi kurashish, davlat organlarida ochiqlikni ta’minlash va huquqiy masalalar bo‘yicha;

ijtimoiy soha, yoshlar siyosati, madaniyat va sport masalalari bo‘yicha;

agrar, qurilish, kommunal sohalar, ekologiya, sanoat va transport masalalari bo‘yicha;

reglament va deputatlik odob-axloqi masalalari bo‘yicha.

Xalq deputatlari Kengashida muvaqqat komissiyalar ham tuzilishi mumkin.

Komissiyalar to‘g‘risidagi nizomlar tegishli xalq deputatlari Kengashi tomonidan tasdiqlanadi.

19¹-modda. Xalq deputatlari Kengashi doimiy va muvaqqat komissiyalarining vakolatlari

Xalq deputatlari Kengashining doimiy va muvaqqat komissiyalari:

o‘z tashabbusiga ko‘ra yoki Kengashning topshirig‘iga binoan Kengash qarorlarining loyihalarini ishlab chiqadi;

faoliyat yo‘nalishi doirasida hududiy dasturlarni ishlab chiqish va amalga oshirishda ishtirok etadi;

xalq deputatlari Kengashi qarorlari loyihalarini dastlabki tarzda ko‘rib chiqadi va ularni Kengash sessiyasida ko‘rib chiqish uchun tayyorlaydi;

xalq deputatlari Kengashi qarorlarining loyihalari yuzasidan xulosalar beradi;

viloyatlar va Toshkent shahri mahalliy budjetlari, shuningdek tumanlar va shaharlar budjetlari loyihalari yuzasidan xulosalar hamda takliflar beradi;

xalq deputatlari Kengashining tavsiyasiga ko‘ra budjet mablag‘larining maqsadli sarflanishi va ulardan samarali foydalanilishi holatini o‘rganadi;

ishchi guruhlar tuzadi, ularning tarkibiga davlat organlari va nodavlat notijorat tashkilotlarining, ilmiy muassasalarning vakillarini, mutaxassislar va olimlarni jalb etadi;

tegishli hududdagi davlat organlari va tashkilotlaridan, mansabdor shaxslardan ma’lumotlarni va ekspert xulosalarini, shuningdek boshqa axborotni talab qilib oladi;

tegishli hududda qonun hujjatlarining va xalq deputatlari Kengashi qarorlarining davlat organlari tomonidan ijro etilish holatini, huquqning qo‘llanilish amaliyotini joylarga chiqqan holda o‘rganadi;

normativ-huquqiy hujjatlarni, xalq deputatlari Kengashi qarorlarini targ‘ib etish, ularning mohiyati va ahamiyatini tushuntirish bo‘yicha tadbirlarni amalga oshiradi.

19¹-modda. Xalq deputatlari Kengashi doimiy va muvaqqat komissiyalarining vakolatlari (davomi)

Doimiy va muvaqqat komissiyalar qonunchilikka muvofiq boshqa vakolatlarni ham amalga oshirishi mumkin.

20-modda. Xalq deputatlari viloyat, tuman, shahar Kengashi kotibiyati

Xalq deputatlari viloyat, tuman, shahar Kengashi faoliyatiga tashkiliy, texnikaviy va boshqa jihatlardan xizmat ko‘rsatish tegishli xalq deputatlari Kengashi kotibiyati tomonidan ta’minlanadi.

Xalq deputatlari viloyat, tuman, shahar Kengashi kotibiyati yuridik shaxs bo‘lib, uning faoliyati tegishli mahalliy budjet hisobidan moliyalashtiriladi.

Xalq deputatlari viloyat, tuman, shahar Kengashi kotibiyatining tuzilmasi, nizomi, shtatlari, uning xodimlari mehnatiga haq to‘lash miqdori va moddiy-texnika ta’minoti, shuningdek ularni saqlash xarajatlari tegishli xalq deputatlari Kengashi tomonidan tasdiqlanadi.

Xalq deputatlari viloyat, tuman, shahar Kengashi kotibiyati xodimlarining mehnatga oid munosabatlari xalq deputatlari mahalliy Kengashlarining vakolatlari muddatiga bog‘liq bo‘lmaydi, kotibiyat mudiri bundan mustasno.

Xalq deputatlari viloyat, tuman, shahar Kengashi kotibiyatining mudiri tegishli xalq deputatlari Kengashi deputatlari orasidan Kengash raisi tomonidan tayinlanadi va doimiy asosda faoliyat yuritadi.

Xalq deputatlari viloyat, tuman, shahar Kengashi kotibiyatining mudiri o‘z vakolatlari davrida ilmiy, ijodiy va pedagogik faoliyatdan tashqari haq to‘lanadigan boshqa turdagi faoliyat bilan shug‘ullanishi mumkin emas.

Xalq deputatlari viloyat, tuman, shahar Kengashi kotibiyati O‘zbekiston Respublikasi Davlat gerbi va o‘z nomi tushirilgan muhriga hamda blankalariga ega bo‘ladi.

20-modda. Xalq deputatlari viloyat, tuman, shahar Kengashi kotibiyati (davomi)

Xalq deputatlari viloyat, tuman, shahar Kengashi kotibiyatining namunaviy tuzilmasi va namunaviy nizomi O‘zbekiston Respublikasi Oliy Majlisi Senatining Kengashi tomonidan tasdiqlanadi.

20¹-modda. Xalq deputatlari Kengashlarining nodavlat notijorat tashkilotlari va fuqarolik jamiyatining boshqa institutlari bilan hamkorligi

Xalq deputatlari Kengashlari nodavlat notijorat tashkilotlari va fuqarolik jamiyatining boshqa institutlari bilan hamkorlikni amalga oshiradi, qonunchilik hujjatlariga muvofiq ularning faoliyatini qo‘llab-quvvatlaydi.

Xalq deputatlari Kengashlari hududiy dasturlarning, Kengash qarorlarining loyihalarini ishlab chiqish masalalari yuzasidan, shuningdek ularning ijrosi ustidan nazorat borasida nodavlat notijorat tashkilotlari va fuqarolik jamiyatining boshqa institutlari bilan hamkorlikni amalga oshiradi.

Bilimingizni sinang