Ma’muriy huquqbuzarlik to‘g‘risidagi ishlarni ko‘rib chiqish (3/3)

To‘Rtinchi Bo‘Lim

313³-modda. Ma’muriy huquqbuzarliklar to‘g‘risidagi ishlarni sudga yuborish tartibi

Vakolatli organ (mansabdor shaxs) jabrlanuvchining yoki uning qonuniy vakilining yarashuv to‘g‘risidagi arizasini olgach, uch kundan ortiq bo‘lmagan muddatda huquqbuzarning roziligiga ko‘ra ishni taraflarning yarashuvi munosabati bilan sudga yuborish haqida qaror chiqaradi hamda ishni tegishliligi bo‘yicha sudga yuboradi.

Qarorning tavsif qismida:

ma’muriy huquqbuzarlik to‘g‘risidagi ishni yuritish uchun asos;

ma’muriy huquqbuzarlik sodir etgan shaxslar va ular tomonidan sodir etilgan ma’muriy huquqbuzarliklar haqidagi ma’lumotlar;

yarashuv to‘g‘risidagi arizaning mazmuni hamda huquqbuzarning arizaga nisbatan munosabati ko‘rsatiladi.

Qarorning qaror qismida:

ishni sudga yuborish haqidagi qaror;

ashyoviy, yozma va raqamli dalillar to‘g‘risidagi ma’lumotlar ko‘rsatiladi.

Agar ish bo‘yicha huquqbuzar sifatida ishtirok etish uchun bir necha shaxs jalb qilingan bo‘lib, ularning barchasi bilan yarashuvga erishilmagan bo‘lsa, yarashuvga erishilmagan huquqbuzarlarga taalluqli materiallar ajratiladi va ular bo‘yicha ish yuritish umumiy qoidalarga rioya etilgan holda amalga oshiriladi.

Ushbu moddaning to‘rtinchi qismida nazarda tutilgan holatlar vakolatli organning (mansabdor shaxsning) ishni taraflarning yarashuvi munosabati bilan sudga yuborish haqidagi qarorida ko‘rsatilishi kerak.

313⁴-modda. Sud muhokamasi

Yarashuv to‘g‘risidagi ishlar bo‘yicha sud muhokamasi ish sudga kelgan paytdan e’tiboran uch kundan kechiktirmay o‘tkazilishi kerak.

Sud majlisida: huquqbuzar, jabrlanuvchi, ularning qonuniy vakillari va, agar ishda qatnashayotgan bo‘lsa, advokat ishtirok etadi.

Yarashuv haqidagi ishlar bo‘yicha sud muhokamasi jabrlanuvchining yarashuv haqidagi arizasini o‘qib eshittirish bilan boshlanadi.

Sud huquqbuzarning va jabrlanuvchining sodir etilgan ma’muriy huquqbuzarlik holatlari to‘g‘risidagi so‘zlarini eshitadi.

Sud:

yarashuvning ixtiyoriyligi va uning sabablarini;

huquqbuzar o‘z aybiga ixtiyoriy ravishda iqror bo‘lganligini;

huquqbuzar o‘zi sodir etgan qilmishning oqibatlarini anglaganligini va yetkazilgan zararni bartaraf etish choralarini ko‘rgan-ko‘rmaganligini;

jabrlanuvchiga yoki huquqbuzarga biron-bir tazyiq bo‘lgan-bo‘lmaganligini;

yetkazilgan zararning o‘rnini qoplash bilan bog‘liq masalalarni;

huquqbuzarning, jabrlanuvchining va ularning qonuniy vakillarining yarashuvga roziliklarini aniqlaydi.

Shundan keyin, agar sud majlisida ishtirok etayotgan bo‘lsa, advokatning fikrini eshitadi.

Agar sud majlisi davomida yarashuv, aybga iqror bo‘lish ixtiyoriy emasligi, zararning o‘rnini qoplashni rad etish hollari aniqlangudek bo‘lsa, sud taraflarning yarashuvi munosabati bilan ishni sudga yuborish to‘g‘risidagi qarorni bekor qiladi va ishni umumiy asoslarda ko‘rib chiqadi.

Biroq, sodir etilgan qilmishda boshqa turdagi ma’muriy huquqbuzarlik yoki jinoyat tarkibi belgilari mavjud bo‘lsa, sud taraflarning yarashuvi munosabati bilan ishni sudga yuborish haqidagi qarorni bekor qiladi va ishni ma’muriy huquqbuzarlik to‘g‘risidagi bayonnomani rasmiylashtirgan yoki ma’muriy huquqbuzarlik haqidagi ishni qo‘zg‘atgan organga umumiy asoslarda ko‘rib chiqish uchun yoki tergovga qadar tekshiruv, surishtiruv va dastlabki tergovni amalga oshirish uchun yuboradi.

313⁴-modda. Sud muhokamasi (davomi)

Sud muhokamasining natijalari bo‘yicha sud qonunda belgilangan tartibda qaror chiqaradi.

Sud majlisi vaqtida ushbu Kodeksning 308-moddasida nazarda tutilgan qoidalarga binoan bayonnoma yuritiladi.

313⁵-modda. Sud qarori

Sud qarorining kirish qismida:

qaror chiqarilgan vaqt va joy;

qaror chiqargan sudning nomi, sudyaning, sud majlisi kotibining, taraflarning, agar ishda ishtirok etayotgan bo‘lsa, tarjimonning ismi, otasining ismi va familiyasi;

huquqbuzarning ismi, otasining ismi va familiyasi, tug‘ilgan yili, oyi, kuni va joyi, yashash joyi, ish joyi, mashg‘ulotining turi, ma’lumoti va ish uchun ahamiyatga molik boshqa ma’lumotlar ko‘rsatiladi.

Sud qarorining tavsif-asoslash qismida yarashuv uchun asos bo‘lgan holatlar bayon etiladi, ushbu Kodeksning 313⁴-moddasida sanab o‘tilgan masalalarga javoblar ifodalanadi.

Qarorning qaror qismida sud quyidagi masalalarni hal etadi:

ma’muriy huquqbuzarlik haqidagi ishni taraflarning yarashuvi munosabati bilan yoki ushbu Kodeksning 310-moddasida ko‘rsatilgan boshqa asoslar bo‘yicha tugatish haqidagi, ma’muriy jazoning qo‘llanilishi to‘g‘risida yoxud uni ma’muriy huquqbuzarlik haqidagi bayonnomani rasmiylashtirgan yoki ma’muriy huquqbuzarlik to‘g‘risidagi ishni qo‘zg‘atgan organga yuborish haqidagi;

ashyoviy, yozma va raqamli dalillar to‘g‘risidagi;

zararning o‘rnini qoplash haqidagi.

Sudning qaroriga huquqbuzar, jabrlanuvchi, ularning qonuniy vakillari, advokat tomonidan shikoyat berilishi hamda prokuror tomonidan protest keltirilishi mumkin.

XXIII² bob. MUAYYAN YASHASH JOYIGA EGA BO‘LMAGAN SHAXSNI REABILITATSIYA MARKAZIGA JOYLASHTIRISH TO‘G‘RISIDA ISH YURITISH

313⁶-modda. Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida iltimosnoma berish

Muayyan yashash joyiga ega bo‘lmagan shaxsning reabilitatsiya markaziga joylashtirilishini talab qiluvchi asoslar aniqlangan taqdirda, ichki ishlar organi bunday shaxs ichki ishlar organiga keltirilgan paytdan e’tiboran 48 soat ichida uni reabilitatsiya markaziga o‘ttiz sutkadan ko‘p bo‘lmagan muddatga joylashtirish to‘g‘risida sudga iltimosnoma yuborish uchun materiallarni tayyorlashi shart.

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnoma va uni reabilitatsiya markaziga joylashtirish zarurligini tasdiqlovchi materiallar muayyan yashash joyiga ega bo‘lmagan shaxs aniqlangan yerdagi yoki reabilitatsiya markazi joylashgan yerdagi jinoyat ishlari bo‘yicha tuman (shahar) sudiga ichki ishlar organi tomonidan beriladi.

313⁷-modda. Iltimosnomaning shakli va mazmuni

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnoma sudga yozma shaklda beriladi va ichki ishlar organining rahbari yoki uning o‘rinbosari tomonidan imzolanadi.

Iltimosnomada quyidagilar ko‘rsatilishi kerak:

• 1) iltimosnoma berilayotgan sudning nomi;
• 2) ichki ishlar organining nomi va joylashgan yeri (pochta manzili);
• 3) muayyan yashash joyiga ega bo‘lmagan shaxsning familiyasi, ismi, otasining ismi;
• 4) iltimosnomaga asos bo‘lgan holatlar;
• 5) berilgan iltimosnomaning asoslarini tasdiqlovchi dalillar;
• 6) muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimos, joylashtirish muddatini ko‘rsatgan holda;
• 7) ilova qilinayotgan hujjatlarning ro‘yxati.

Iltimosnomada ichki ishlar organining telefon, faks raqamlari, elektron manzili ko‘rsatilishi mumkin.

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida ushbu moddada nazarda tutilgan talablarni buzgan holda berilgan iltimosnoma ichki ishlar organiga qaytariladi.

313⁸-modda. Iltimosnomaga ilova qilinadigan hujjatlar

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnomaga quyidagilar ilova qilinadi:

• 1) muayyan yashash joyiga ega bo‘lmagan shaxsni aniqlagan mansabdor shaxsning muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida sudga iltimosnoma kiritish to‘g‘risida tegishli tuman (shahar) ichki ishlar organi boshlig‘i tomonidan tasdiqlangan qarori;
• 2) yashash manzillari (manzillar bo‘yicha byuro) haqida ma’lumotlar beruvchi organning ma’lumotnomasi, shuningdek muayyan yashash joyiga ega bo‘lmagan shaxsning O‘zbekiston Respublikasidagi ma’lum bo‘lgan oxirgi yashash joyini tekshirish natijalari to‘g‘risidagi ma’lumot;
• 3) muayyan yashash joyiga ega bo‘lmagan shaxsning tushuntirishi yoki bunday shaxs tomonidan tushuntirish berish rad etilganligi to‘g‘risida tegishli tarzda tuzilgan dalolatnoma;
• 4) muayyan yashash joyiga ega bo‘lmagan shaxsni tibbiy ko‘rikdan o‘tkazish natijalari to‘g‘risidagi tibbiy ma’lumotnoma;
• 5) muayyan yashash joyiga ega bo‘lmagan shaxsning huquqlari, shu jumladan advokatning yuridik yordamidan foydalanish huquqi va o‘z yaqinlariga telefon orqali qo‘ng‘iroq qilish huquqi tushuntirilganligi haqidagi bayonnoma.

Iltimosnomaga bildirilgan iltimosnomani asoslovchi boshqa hujjatlar ham ilova qilinishi mumkin.

313⁹-modda. Iltimosnomaning sud tomonidan ko‘rib chiqilishi

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnoma taqdim etilgan paytdan e’tiboran 24 soat ichida sudya tomonidan yopiq sud majlisida yakka tartibda ko‘rib chiqiladi.

O‘ziga nisbatan reabilitatsiya markaziga joylashtirish to‘g‘risidagi iltimosnoma ko‘rib chiqilayotgan shaxs va ichki ishlar organining vakili sud majlisida ishtirok etishi shart. Sud majlisida advokat ishtirok etishi mumkin.

Iltimosnomani ko‘rib chiqish ichki ishlar organi vakilining muayyan yashash joyiga ega bo‘lmagan shaxsni reabilitatsiya markaziga joylashtirish zarurligi va joylashtirish muddati asoslab beriladigan ma’ruzasi bilan boshlanadi. So‘ngra o‘ziga nisbatan iltimosnoma ko‘rib chiqilayotgan shaxs, agar sud majlisida ishtirok etayotgan bo‘lsa, advokat, sudga kelgan boshqa shaxslar eshitiladi, taqdim etilgan materiallar tekshiriladi.

Qaror sudya tomonidan alohida xonada chiqariladi.

Iltimosnomani ko‘rib chiqish natijalari bo‘yicha sud quyidagi qarorlardan birini chiqaradi:

iltimosnomani qanoatlantirish va muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida;

iltimosnomani qanoatlantirishni rad etish haqida.

Iltimosnomani qanoatlantirish va muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida yoki qanoatlantirishni rad etish haqidagi qaror o‘qib eshittirilgan paytdan e’tiboran kuchga kiradi va darhol ijro etilishi lozim.

313⁹-modda. Iltimosnomaning sud tomonidan ko‘rib chiqilishi (davomi)

Qaror ijro etish uchun darhol ichki ishlar organi vakiliga, agar sud majlisida ishtirok etgan bo‘lsa, advokatga va o‘ziga nisbatan qaror chiqarilgan shaxsga topshiriladi.

Muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnomani ko‘rib chiqish natijalari bo‘yicha chiqarilgan qaror ustidan ushbu qaror chiqarilgan kundan e’tiboran uch kun ichida o‘ziga nisbatan qaror chiqarilgan shaxs, uning qonuniy vakili va advokat apellyatsiya tartibida shikoyat berishi, prokuror esa apellyatsiya protesti keltirishi mumkin.

Apellyatsiya instansiyasi sudining sudyasi qaror ustidan berilgan shikoyatni (protestni) u kelib tushgan kundan e’tiboran uch kun ichida yakka tartibda ko‘rib chiqib, uning natijalari bo‘yicha quyidagi qarorlardan birini chiqaradi:

qarorni o‘zgarishsiz, shikoyatni (protestni) esa qanoatlantirmasdan qoldirish to‘g‘risida;

muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risidagi iltimosnomani qanoatlantirish haqidagi qarorni bekor qilish va shaxsni reabilitatsiya markazidan ozod qilish haqida;

iltimosnomani qanoatlantirmasdan qoldirish haqidagi qarorni bekor qilish va muayyan yashash joyiga ega bo‘lmagan shaxsni reabilitatsiya markaziga joylashtirish to‘g‘risida.

Bilimingizni sinang