Diniy tashkilotni ro‘yxatdan va qayta ro‘yxatdan o‘tkazish tartibi (2/2)

Moddalar

20-modda. Diniy tashkilotni ro‘yxatdan o‘tkazish to‘g‘risidagi murojaatni ko‘rib chiqish

Elektron murojaatni yuboruvchi elektron so‘rovni shakllantirishni yakunlab, elektron tizim tomonidan avtomatik tarzda belgilanadigan davlat boji to‘lovini amalga oshiradi.

Davlat boji to‘langanidan keyin diniy tashkilotni ro‘yxatdan o‘tkazish to‘g‘risidagi murojaat ko‘rib chiqish bosqichiga o‘tadi.

Agar murojaatda to‘g‘rilash mumkin bo‘lgan xatolar mavjud bo‘lsa yoki ushbu Qonunda talab qilinadigan yoxud elektron murojaatni yuboruvchi havola qilayotgan hujjatlar mavjud bo‘lmasa, ro‘yxatdan o‘tkazuvchi organ unga besh ish kuni ichida xatolarni tuzatish va yetishmayotgan hujjatlarni yuborish uchun imkon beradi. Ro‘yxatdan o‘tkazuvchi organ elektron murojaatni yuboruvchining iltimosnomasiga ko‘ra bu muddatni besh ish kunidan kam bo‘lmagan muddatga uzaytirishi mumkin.

Ro‘yxatdan o‘tkazuvchi organ diniy tashkilotni ro‘yxatdan o‘tkazish uchun yuborilgan hujjatlarning ishonchliligini va ularning qonunchilikka muvofiqligini tekshirishga haqli.

21-modda. Diniy tashkilotni ro‘yxatdan o‘tkazish to‘g‘risidagi hujjatlarni ko‘rib chiqish muddatlari

Diniy tashkilotni ro‘yxatdan o‘tkazish to‘g‘risidagi hujjatlar ro‘yxatdan o‘tkazuvchi organ tomonidan quyidagi muddatlar ichida ko‘rib chiqiladi:

diniy tashkilotni ro‘yxatdan o‘tkazish uchun — murojaat olingan kundan e’tiboran bir oylik muddatda;

diniy tashkilotni qayta ro‘yxatdan o‘tkazish uchun — murojaat olingan kundan e’tiboran o‘n besh kunlik muddatda.

22-modda. Diniy tashkilotni ro‘yxatdan o‘tkazish to‘g‘risidagi hujjatlarni ko‘rib chiqish yakunlari

Ro‘yxatdan o‘tkazuvchi organ diniy tashkilotni ro‘yxatdan o‘tkazish to‘g‘risidagi hujjatlarni ko‘rib chiqish yakunlariga ko‘ra quyidagi qarorlardan birini qabul qiladi:

diniy tashkilotni ro‘yxatdan o‘tkazish haqidagi;

diniy tashkilotni ro‘yxatdan o‘tkazishni rad etish to‘g‘risidagi.

Diniy tashkilotni ro‘yxatdan o‘tkazish to‘g‘risida qaror qabul qilingan taqdirda, ro‘yxatdan o‘tkazuvchi organ qaror qabul qilingan sanadan e’tiboran uch ish kuni ichida:

diniy tashkilot haqidagi ma’lumotlarni diniy tashkilotlar reyestriga kiritadi;

diniy tashkilotni soliq organlarida va statistika organlarida hisobga qo‘yishni amalga oshiradi;

elektron tizimda diniy tashkilotning shaxsiy kabinetini yaratadi;

diniy tashkilotning ro‘yxatdan o‘tkazilganligi to‘g‘risidagi elektron guvohnomani shakllantiradi;

diniy tashkilotning ro‘yxatdan o‘tkazilganligi to‘g‘risidagi elektron guvohnomani va diniy tashkilot ustavini diniy tashkilotning elektron tizimdagi shaxsiy kabinetiga yuboradi.

Diniy tashkilotning qayta ro‘yxatdan o‘tkazilganligi to‘g‘risidagi elektron guvohnomada diniy tashkilot haqidagi avvalgi ma’lumotlar, shu jumladan uning nomi, ro‘yxatdan o‘tkazuvchi organning nomi, diniy tashkilot ro‘yxatdan o‘tkazilgan sana, shuningdek qayta ro‘yxatdan o‘tkazilgan sana ko‘rsatiladi.

Ro‘yxatdan o‘tkazuvchi organning o‘zgarishi munosabati bilan diniy tashkilot qayta ro‘yxatdan o‘tkazilgan taqdirda, yangitdan ro‘yxatdan o‘tkazgan organ ilgarigi ro‘yxatdan o‘tkazuvchi organni tegishli ro‘yxatdan o‘tkazishga oid ma’lumotlarni ko‘rsatgan holda elektron tizim orqali bu haqda xabardor qiladi.

22-modda. Diniy tashkilotni ro‘yxatdan o‘tkazish to‘g‘risidagi hujjatlarni ko‘rib chiqish yakunlari (davomi)

Diniy tashkilotni ro‘yxatdan o‘tkazish rad etilgan taqdirda, qaror qabul qilingan kundan keyin bir ish kuni ichida elektron murojaatni yuboruvchining elektron tizimdagi shaxsiy kabinetiga rad etish asoslari ko‘rsatilgan holda xabarnoma yuboriladi.

Diniy tashkilotni ro‘yxatdan o‘tkazish rad etilganligi, basharti rad etish asoslari bartaraf etilsa, hujjatlarni takroran taqdim etish uchun monelik qilmaydi.

23-modda. Diniy tashkilotni ro‘yxatdan o‘tkazishni rad etish uchun asoslar

Diniy tashkilotni ro‘yxatdan o‘tkazish quyidagi hollarda rad etilishi mumkin, agar:

diniy tashkilotning tashkil etilishi konstitutsiyaviy tuzumni zo‘rlik bilan o‘zgartirish, O‘zbekiston Respublikasining suvereniteti, yaxlitligi va xavfsizligiga qarshi chiqish, fuqarolarning konstitutsiyaviy huquq va erkinliklarini kamsitish, urushni, ijtimoiy, milliy, irqiy hamda diniy adovatni targ‘ib etish, fuqarolarning sog‘lig‘iga va xalqning ma’naviyatiga tajovuz qilish maqsadini ko‘zlagan bo‘lsa;

diniy tashkilotni tuzishning qonunda belgilangan tartibi buzilgan bo‘lsa yoki taqdim etilgan hujjatlarda qonunchilikka nomuvofiqliklar mavjud bo‘lsa;

tuzilayotgan tashkilot diniy tashkilot sifatida e’tirof etilmagan bo‘lsa;

taqdim etilgan ta’sis hujjatlarida atayin noto‘g‘ri axborot mavjudligi aniqlangan bo‘lsa.

Ro‘yxatdan o‘tkazuvchi organning diniy tashkilotni ro‘yxatdan o‘tkazishni rad etish to‘g‘risidagi qarori ustidan sudga shikoyat qilinishi mumkin.

24-modda. Diniy tashkilotlar reyestri

Ro‘yxatdan o‘tkazilgan diniy tashkilot adliya organlari tomonidan elektron tizimda yuritiladigan va hamma tanishib chiqishi uchun ochiq bo‘lgan diniy tashkilotlar reyestriga (bundan buyon matnda reyestr deb yuritiladi) kiritiladi.

Reyestrda quyidagilar ko‘rsatiladi:

diniy tashkilotning nomi va uning qaysi konfessiyaga mansubligi;

diniy tashkilotning joylashgan yeri (pochta manzili);

diniy tashkilot faoliyat ko‘rsatadigan hudud;

tashabbuskorlar (ta’sischilar) ishtirokchilar to‘g‘risidagi axborot (familiyasi, ismi, otasining ismi), aloqa bog‘lash uchun ma’lumotlar;

rahbar organning nomi va pochta manzili, aloqa bog‘lash uchun ma’lumotlar;

diniy tashkilot ro‘yxatdan o‘tkazilgan sana va boshqa axborot.

Bilimingizni sinang